Hollands is de naom vaan de groop Nederlandse dialekte die gesproke weure in de provincies Noord-Holland, Zuid-Holland behave Goerree-Euverflakkee, Utrei, e klei deil vaan Noord-Braobant en Gelderland en allewijl ouch in Flevoland. In 't algemein spraokgebruuk in de perifeer gebede vaan Nederland is 't ouch de naom veur de Nederlandse staanderdtaol, die inderdaod veural op de Hollandse dialekte gebaseerd is; ouch boete 't Nederlands taolgebeed weurt 't Nederlands dèks es Hollands aongemerk.

't Hollands kinmèrk ziech door 't persuunlik pronoom jij veur de twiede persoen, in tegestèlling tot 't Braobants gij. De Aajdgermaanse vocaole î en û zien, zjus wie op 't Braobants en in tegestèlling tot 't Ziews, gebroke tot ij en ui of variante daovaan (wie aai, ai, oi of è) (behave in e paar noordelike anclaves). Diminutieve weure in de meiste gevalle gevörmp mèt -ie, 'n vocalisatie vaan -je (staanderdtaol, Ziews), wat weer 'n palatalisatie vaan -ke (Braobants, Limburgs) is. Wie alle westelike dialekte kinne de Hollandse dialekte gei zich, meh gebruke ze dao m'n eige, je eige, z'n eige etc. veur. 't Hollands kint e dialekcontinuüm mèt 't Ziews, 't Braobants en 't Nedersaksisch.

De vocaole vaan 't Hollands verraoje de invlood die 't Braobants vreuger op de dialekte had. De bove besjreve diftongering is wel vaanuit Antwerpe via Breda, Dordrech, Rotterdam en teslotte Amsterdam verspreid.

't Hollands kin wijer weure opgedeild in de volgende dialek-gebede:

• Zuid-Hollands, rouw-eweg gans Zuid-Holland, mèt de Noord-Hollandse stei Amsterdam en Haarlem;
• Strand-Hollands, 'ne conservatieve variant vaan 't Zuid-Hollands, die me in de vèssersdörper vaan dees provincie sprik;
• Utreis-Alblasserwierds, in 't groetste deil vaan de provincie Utrei en 't uterste ooste vaan Zuid-Holland;
• Noordweshooks, in 't uterste noordweste vaan Noord-Braobant;
• Eemlands, in 't noordooste vaan de provincie Utrei;
• Kennemers, Zaans, Waterlands, in zuidelik Noord-Holland;
• Wesfries, in Wesfriesland (e groet deil vaan Noord-Holland);
• Tessels, op Tessel'''.

Nederlands | Hollandic | Hollandi keel | Hollannin kieli | Bahasa Belanda | Dialetto olandese | Hollands (dialect) | Język holenderski | Hollánddagiella