Sinte Briej (Nederlands: Brigida van Kildare) ies 'n Ierse volksheilige. Zoawaal in Norbik es in Middelar bie Mook ies de parochiekèrk aan häör gewiejd. Hie bevinge ziech ouch relieke. Ter ière van deze heilige weure baevaarte gehoute.

Gesjiedenis

---

Rónd 't jaor 453 weurt Brigida gebore in Faughart in Ierland. In 523 sjtörf ze in Kildare. Zie ies de knappe dochter van de leider van de sjtam Leinster. Es häöre vader häör probeert oet te huwelike baejt ze um lièlik te weure. Dat gebeurt dan ouch en zie sjtiech daonao 't allerièrsjte kloaster in Ierland: Kildare.

Abdis Brigida en de ander zuustersj reikden 'n helpende hand aan de missionarisse, die volgelinge waore van de heilige Patrick.

Legendes

---

Van Sinte Briej zint väöl wónderverhaole en legendes bekènd. Zoa zou edere boum dae zie aanraakde metein in de bleuj goon. Waarsjienlik zint ouch elemente oet 't leve van de Keltische godin Brigantia later aan Brigida toegesjreve. Briej weurt ouch waal Mary of the Gael geneump ofwaal Maria van de Kelte.

In Limburg

---

In Limburg ies Sinte Briej veural bekènd es patroanheilige van 't viè. Daorum weurt ze ummer aafgebeeld mèt dere aan häör veut. Op 1 februari weurt häöre fièsdaag gevierd in de katholieke kèrk, bieveurbeeld in Norbik. Dao weurt dan water en broad gezegend, dat de boere wir aan veur 't viè vore. Vanoet Wittem vertrèk 'n boetebaevaart nao Norbik.

heilige

Svatá Brigita | Brigida von Kildare | Brigid of Ireland | Brigitte d'Irlande | Święta Brygida z Kildare | Бригитта Ирландская