Zellkär

Den Zellkär ass déi gréissten Organell an enger eukaryotescher Zell (ongeféier 10 μm Duerchmiesser). En ass vun der souegenannter Kärenvelopp emginn, eng duebel Biomembran. En enthält d'Kärplasma mat der Chromatin. Déi roud Bluttkierpercher vu Mamendéieren an d'Bluttplättecher hu keen Zellkär.

Kärenvelopp

Den Zellkär ass duerch eng duebel Membran vum Zytoplasma ofgetrennt. Well et keng einfach Membran ass ewéi en se ronderem d'Zell an aner Organelle fënnt, seet en besser Kärenvelopp ewéi Kärmembran. De Raum tescht denen 2 Membranen heescht perinukleare Raum. D'Kärenvelopp ass no baussen a Verbindung mam endoplasmatesche Reticulum. Bannenan gett se vun der Nuklearlamina (eng Schicht Intermediärfilamenter) doubléiert déi se stabiliséirt an un där d'DNS sech ka festmaachen.

Fir den Traffik tescht dem Kärplasma an dem Zytoplasma ze erméiglechen, befannen sech an der Kärenvelopp Poren déi Substanzen eran an eraus loossen.

Um Ufank vun der Zelldelung gett d'Nuklearlamina phosphoriléiert an d'Envelopp "zersetzt" sech, bleiwt awer ennert der Form vun Vesikelen erhalen. Um Enn vun der Zelldelung gett d'Lamina dephosphoriléiert an d'Envelopp setzt sech nees aus de Vesikelen zesummen.

Rolle vum Zellkär

Am Zellkär gett d'DNS stockéiert an déi nei DNS synthetiséiert (= Replikatioun). Doniewt ginn och d'RNSen am Kär hiergestallt (= Transkriptioun).

Am Kär kann awer keng Protein synthetiséiert ginn, dës mussen all aus dem Zytoplasma importéiert ginn, z. B. d'Histonen, déi verschidde Polymerasen.

Nukleol

D'Nukleol ass eng Regioun am Kär an där verschidden ribosomal RNSen hiergestallt ginn an sech dann matt de Ribosomproteinen verbannen déi importéiert goufen. Eng aner Funktioun vun Nukleol ass Synthes vun NAD⁺.

Zytologie

Gourt Home::Gourt :: Zellkär

Kärenvelopp

Rolle vum Zellkär

Nukleol