Gloria Macapagal Arroyo

Ni Gloria Macapagal Arroyo (naipasngay idi Abril 5, 1947), ti maika-14 ken ti agdama a Presidente ti Filipinas. Isu ti maikadua a babai a presidente ti Filipinas (kaunaan ni Corazon Cojuangco Aquino) ken ti umuna a babai a nag-vice presidente (idi 1998). Anak ni sigud a Presidente Diosdado Macapagal.

Nagbalin a presdiente ni Arroyo idi 2001 gapu iti Maikadua a Revolusion ti EDSA a nakapatapuakan ni Presidente Joseph Estrada iti poder ken takem gapu kadagiti pammabasol iti korupsion iti goviernona. Iti eleksion idi 2004, nangabak ni Arroyo kas presidente (inabakna ni aktor a Fernando Poe, Jr. a kapigsaan a kinabalubalna) iti baet ti adu a sayangguseng maipapan iti maatap a panagsuitik iti botos, kangrunaan ditoyen ti naibutaktak a "Hello, Garci" tapes a maipagarup a patangan iti panagsuitik da Arroyo ken dadduma pay a politiko ken personalidad ken ni sigud a komisioner ti Komision iti Eleksion (COMELEC) Virgilio Garcillano.

Idi 2005, napili ni Arroyo kas maikapat a kabibilegan a babai iti sangalubongan iti magasin a Forbes.

Idi Febrero 24, 2006, inyetnagna iti pagilian ti maysa nga kasasaad nga emerhensia kas sungbat iti naiwaragawag a napaay a panangrabsut iti turay (coup d'etat) ti maipagarup a nagkukumplot a sumagmamano nga ofisiales ken kamkameng a soldado ti Armado a Fuerza ti Filipinas ken sumagmamano a kameng ti political nga oposision ken dagiti maatap a Comunista.

Gourt Home::Gourt :: Gloria Macapagal Arroyo