Gourt Home::Gourt :: Regensdorf
Related Topics:Regensdorf
| Regensdorf | |
|---|---|
| Basisdate | |
| Kanton: | Züri |
| Bezirk: | Dielsdorf |
| BFS-Nr.: | 0096 |
| PLZ: | 8105 |
| Flächi: | 14.62 km² |
| Koordinate: | 47° 26' n. Br., 8° 28' ö. L. |
| Höchi: | 443 m.ü.M. |
| Ywohner: | 15'336 (2003) |
| Gmeindämaa | - |
| Karte Gemeinde Regensdorf.png | |
Geographie
Nur wenigi Kilometer äwegg vom Zäntrum vo dä Stadt Züri und vom Flughafä Chlootä erstreckt sich diä Gmeind quer über s'Zürcher Furttal. Das Tal bildät ä diräkti Verbindig zwüschä dä beide starchä Wirtschaftsregionä im Ruum Züri-Nord und Züri-West. Wägä sinrära attraktivä Laag hät sich Rägesdorf i dä letschtä 50 Jaar vomenä Buurädorf zunärä moderne Zäntrumsgmäind entwickelt.
Ortsteil
D'Gmäind Rägesdorf bestaat us drüü Ortsteil: Rägesdorf, Adlikä und Watt. Unter denä bestaat än Art Arbetsteilig:Regäsdorf isch dä Sitz vo dä Verwaltig und em Dienstleistingszäntrum mit Läde, Restaurants, Hotels und ämä Kongrässzäntrum.
Adlikä bestaat us änäre altä dörflich-ländlichä Umgäbig. Wiiter gits ä grossi Wohnüberbauig mit äm Namä "Sunähaldä". Si isch vo dä Immobiliäfirma Göhner erstellt wurdä und wird drum au Göhnerswil gnännt. Es git au än Industriezonä. Alläs isch mit ämänä Bahn- und Strassänetz aapundä. Adlikä isch ä Zivilgmeind (lüäg wiiter unä).
Watt isch im Chern immer no äs Buurädorf. Dett isch d'Tradition dihäi. Watt isch au ä Zivilgmeind (lüäg wiiter unä).
Wirtschaft
I dä Stadt Rägesdorf git's über 8000 Arbätsplätz. Di verchehrstechnischä Vorteil i dä Nöchi vor dä Autobahn-Nordumfahrig vo dä Stadt Züri und vom Flughafä hät vill Unternämä (z.B. SAP und Möväpick) dazu praacht, iri Administration und teils auch iri Produktion i dere Furttalstadt aaz'sidlä.
Gschicht
D'Ursprüng vo dä modernä Siedligä sind im 6. Jahrhundert, in dä Ziit vo dä Landnahm vo dä Alemanne. Di ältesti erhalteni Urkund, wo Rägesdorf als Reganesdorf erwähnt, isch vom Jahr 870.
D'Freiherre vo Rägäsberg händ im Hochmittelalter ä wesentlichi Rollä gspillt. Si händ auf ämänä chliinä Moränehügel bim hütigä Wiiler Altburg im 11. Jahrhundert ä Burg bout. D'Überrestä vo dere Burg, d'Ruine Altburg, sind no hütt z'besichtigä.
Sit em 12. Jahrhundert bestönd in Rägesdorf grad zwei Chilänä, wo nööch binänand ligged. Eini dävo chönnt ursprünglich än Eigenkirche vo dä Regensberger gsii sii, die ander isch ä Filialchilä vo Höngg bi Züri. Diä zwei Gotteshüser sind au dä Aalass gsi, dass sich in Rägesdorf zwei Dorfteilen pildät händ, s'Vorderdorf und s'Hinterdorf.
Rägesdorf liit am Südrand vo dä Furttal-Ebäni, wo hüt wiitgehend überbout isch. Diä Ebeni isch äs versumpfts Riedland gsii und drum für landwirtschaftlichi Zwäck fasch nöd nutzbar, bis mer dänn 1870 dä Furtbach abgsänkt hätt.
Uf dä Nordsiitä vo dem ehemaaligä Riäd ligäd, nach Südä exponiert, Watt und Adlikä. D'Trochäleggig vom Furttal hät d'Erschlüüsig durch Landwirtschaft und Industrie ermöglichät. Uf dä Buo vo dä Iisäbaan hätt mer bald die erstä Fabrikä pout. Au di kantonali Straafanstalt Pöschwiis isch in Regensdorf bout wordä. Das hät im Rest vom Kanton äm Satz "nach Rägesdorf gaa" än psundärä Biigschmack gää.
D'Gschicht vo dä Region wird vo dä HVF (Heimatkundlichi Vereinigung Furttal) erforscht. Diä Vereinigung setzt sich für d'Bewahrig vo wertvollä Objekt und Landschaftä ii.
Zivilgemeindä
In dä politischä Gemeind Regensdorf händ di beide Ort Watt und Adlikä je än eigeni Zivilgemeind biiphaltä.
Zivilgemeinde Adlikä. Sii underhaltäd d'Fluärwäg und betriibt än eigeni Wasserversorgig für dä alti Täil vo Adlikä. D'Vorsteherschaft umfasst drüü Mitglider (Presidänt, Guätsverwalter und Biisitzer). Jöörlich finded 3-4 Gmeindsversammligä statt - im Gägesatz zu dä Stadt, wo's settigi Versammligä nüme gitt.
Zivilgmeind Watt. Dadäzuä ghöred dä Ortsteil Watt und dä Wiiler Altburg. D'Flächi beträit total 588 ha. Wie z'Adlikä isch au da d'Wasserversorgig än zentralä Uufgabäbereich vo dä Zivilgmeind.
Politik
Gmäindspresidäntin isch no d'Erika Kuczynski (2005).
Weblinks
"Regensdorf"