Bundesratszimmer.jpg Dr Bundesrat (franz. Conseil fédéral, ital. Consiglio federale, rätoroman. Cussegl federal) isch d Regierig (Exekutive) vo dr Schwiizerische Eidgenosseschaft und demit ihri oberschti leitendi und vollziehendi Bhörde. Dr Bundesrat isch zuegliich s Schtaatsoberhaupt vo dr Schwiiz. D Personalunion vo Regierig und Schtaatsoberhaupt isch schtaatrechtlich zwar nöd singulär (prominents Biischpiil sind d USA), aber im internationale Vergliich doch d Uusnahm. Sehr ungwöhnlich isch allerdings, dass es Kollektiv Schtaatsoberhaupt isch. Dr Bundesrat setzt sich us siebe Mitgliidern zäme, wo einzeln ebefalls Bundesrat oder Bundesrätin heissed und vo dr Vereinigte Bundesversammlig uf vier Jahr use gwählt werded. (Für Nähers zum Wahlprozedere lueg: Bundesratswahle). Falls es us schprachliche Gründe nötig isch, zwüsched dr Bhörde und em einzelne Mitgliid z underscheide, nennt mer s erschte au Gsamtbundesrat.

Amtsduur

---

Wil es Misstrauesvotum i dr Verfassig nö vorgseh isch, chönnd Bundesrät während dr Legislaturperiode nöd gschtürzt werde. Au e Nödwiederwahl vomene amtierende Bundesrat isch nöd üblich und isch sit 1848 erscht dreimal passiert, zletscht am 10. Dezember 2003, wo d Bundesrätin Ruth Metzler-Arnold nöd wiedergwählt worde isch. Wil Bundesrät also de facto unabsetzbar sind und de Termin vo ihrem Rücktritt nach eigenem Guetdünke bestimme chönnd, händ si e viil schtärcheri Stellig als d Minischter i andere Länder; der Befund isch zum Teil demit erchlärbar, dass en Bundesrat zugliich Teil vom Schtaatsoberhaupt isch. Dadruus ergit sich au e sehr langi Amtsduur vo de Bundesrät (ca. 10 Jahr im Durchschnitt). Die längschtdienende Bundesrät im 20. Jahrhundert sind de Giuseppe Motta vo 1911 bis 1940 und de Philipp Etter vo 1934 bis 1959 gsii.

Wahlverfahre

Di Vereinigt Bundesversammlig wählt us de siebe Bundesrät de Bundespräsident sowie de Vizepräsident vom Bundesrat für e Amtsduur vo eim Jahr. Gmäss de Tradition werded die Positione der Reihe naa allne Mitglieder vom Bundesrat übertrait. Es neus Bundesratsmitgliid wird üblicherwiis zerscht zum Vizepräsident und aaschlüüssend zum Bundespräsident gwählt, nachdems under em Präsidium vo allne amtsältere Kollege gwürkt hät. Dr Bundespräsident hät als erschte under Gliiche (primus inter pares) kei erwiitereti Recht, sondern erfüllt Repräsentationsuufgabe und leitet d Bundesratssitzige. Insbesondere isch dr Bundespräsident nöd öppe s Schtaatsoberhaupt, obwohl er international oft so wahrgeoo wird. Im Jahr 2006 isch de Moritz Leuenberger Bundespräsident und d Micheline Calmy-Rey Vizepräsidentin.

Underschiid zu andere Länder

Di siebe Bundesrät regiered eigentlich gmeinsam über alli Gschäfte, aber tatsächlich stönd sie je eim Departement vor (Departementalprinizip) und sind dur das vergliichbar mit Minister in andere Länder. Bedüütsami Underschied bestönd da drin, dass en Bundesrat zugliich no Teil vom Schtaatsoberhaupt isch, und dass es kein richtige Regierigschef mit Wiisigsbefugnis oder wenigschtens Richtlinienkompetenz git. Dr Bundespräsident hät im Vergliich zu de übrige Bundesrät au im äusserschte Fall nur de Stichentscheid binere suscht unentschiedene Abstimmig im Gsamtbundesrat. D Verteilig vo de Departement wird jewiils nach dr Bundesratswahl dur d Bundesrät selber vorgnoo, es gibt uusdrücklich keis Mitwürkigsrecht vom Parlament. D Lischte vo de Departement und de aktuell zueschtändige Bundesrät:

• Eidgenössischs Departement für usswärtigi Aaglegenheite (EDA) (Micheline Calmy-Rey)
• Eidgenössischs Departement vom Innere (EDI) (Pascal Couchepin)
• Eidgenössischs Juschtiz- und Polizeidepartement (EJPD) (Christoph Blocher)
• Eidgenössischs Departement für Verteidigung, Bevölcherigsschutz und Schport (VBS) (Samuel Schmid)
• Eidgenössischs Finanzdepartement (EFD) (Hans-Rudolf Merz)
• Eidgenössischs Volkswirtschaftsdepartement (EVD) (Joseph Deiss, ab 1. August 2006 Doris Leuthard)
• Eidgenössischs Departement für Umwelt, Verchehr, Energie und Kommunikation (UVEK) (Moritz Leuenberger)

Drüber use sind jedoch alli Bundesrät au für sämtlichi Gschäfte vo de andere Departement mit zueschtändig und händ dur das erheblichi Mitspraach- und Iiflussmöglichkeite. D Beschlüsse vom Bundesrat werded dur s Kollegium mit Mehrheitsentscheid 'troffe und müend dänn vom zueschtändige Departementsvorschteher vor Parlament und Öffentlichkeit au dänn vertrete werde, wenn der de 'troffeni Entscheid eigentlich ablehnt (Kollegialitätsprinzip). Dr Grundsatz berueht allerdings nur uf ungschriebener Tradition und isch nöd gesetzlich greglet. Sit Alters her isch es uusnahmswiis als zuelässig erachtet worde, dass en Bundesrat e vom Gsamtbundesrat abwiichendi Meinig öffentlich kundtuet, wenn er sich uf Gwüssensgründ berüeft und s Gschäft im Übrige nöd vo ihm bearbeitet wird. Es isch in letschter Zit jedoch immer öfter z beobachte gsii, dass einzelni Bundesrät Entscheid vom Kollegium meh oder weniger offe z desavouiere versucht händ. So werded Sinn und Unsinn vom Kollegialitätsprinzip au immer wieder i de Medie und in politische Gremie thematisiert.

Dr Bundesrat wird dur de Bundeskanzler oder d Bundeskanzlerin unterschtützt. Der leitet d Bundeskanzlei, wo als Schtaabsschtell vom Bundesrates dient.

Lueg au

---

• Lischte vo de Mitgliider vom Schwiizerische Bundesrat
• Lischte vo de Schwiizer Bundespräsidente
• Zauberformle

Weblinks

---

• Website vo dr Schwiizer Regierig
• Departemente und Untereinheiten|Departement und Undereinheite
• Artikel Bundesrat im Historische Lexikon vo dr Schwiiz

Department (Schweiz) | Exekutive

Bundesrat (Schweiz) | Swiss Federal Council | Consejo Federal | Conseil fédéral | Dewan Federal Swiss | Consiglio federale | 連邦参事会 | Bondsraad (Zwitserland) | Forbundsrådet (Sveits) | Consiliul Federal Elveţian | Förbundsrådet (Schweiz)