Gourt Home::Gourt :: Bundespräsident
I dem Artikel gaats um de Bundespresidänt i de Schwiiz. Wiens z Öschtriich und z Tütschland isch, mues mer deet naalääse.
Wils nöd guet gaat, das bimene Staatspsuech oder emene Empfang amigs ali sibe Bundesräät dastönd, isch eine vonene amigs für es Jaar Bundespresidänt. Dë hät zwar nöd mee Macht oder mee z säge, es isch vor allem e röpräsentativi Uufgab. Gwält wird de Bundespresidänt vo de Vereinigte Bundesversammlig aafangs Dezämber. So hät er gnueg Ziit, d Neujaarsaaspraach für sin Amtsaatritt am 1. Jänner vorzbereite.
Waal
E groosi Überraschig isch es amigs nöd, wär Bundespresidänt wird. Mer weises scho im voruus. S isch de Vizepresidänt vom vorig Jaar. Und im Normalfall gaats eifach schön de Reie naa. Dëë Bundesraat, wo Bundespresidänt isch, phaltet sis Departemänt und isch sozsäge "im Näbenamt" no Presidänt. Früener aber häd de Bundespresidänt amigs müesse fürs Amtsjaar s Politische Departemänt (hüt gheissts EDA) übernee, wil das am wenigscht ztue gäbe (hät mer bis 1920 gmeint). Bis dänn isch Amt vom Bundespresidänt au en Uszeichnig gsi, und Bundesräät, wom mer nöd e so gärn ka häd, sinds nie worde. Zum Biischpiil de Wilhelm Matthias Naeff, won 27 Jaar Bundesraat gsi isch und nume einisch Presidänt.
Uufgabe
De Bundespresidänt isch nöd Regierigsschef und nöd Staatsoberhaupt. Er übernimmt di röpresentative ufgabe vo me Staatsoberhaupt. Das isch vor alem im Inland, won er d Neujaarsaaspraach und d Reed zum 1. Augschte häd. Wänn er is Usland reist, tuet er das nöd als Bundespresidänt, sondern als Minischter vo sim Departemänt.
Luege au
Bundespräsident (Schweiz) | President of the Swiss Confederation | Président de la Confédération suisse | Presiden Konfederasi
"Bundespräsident"